LollaseGoete (Lolla's Thingz)

Dinsdagoggend-inloer

*Not my own picture – Photo by Karolina Grabowska on Pexels.com*

Vanoggend se gesiggieboek inskrywing:

Vroegoggend karatekungfu om die piepklein zzziieeeoemende vreksels met die iri-flippen-zoemzoem by te kom (onsuksesvol). Ten minste ses nuwe gifjikkende opgehewe bytplekke op die een been (lees voet-been-boud) wat altyd halstarrig onder die kombers uitsteek.

Buite tjierietjierie die grootboom vol voëltjies vrolik en ek kan sweer ek hoor een grootbek sing: ‘opstaan luigat tjietjieee dis ‘n nuuuutjietjiewe dag’ . Mens voel so half om self te begin ttwwwweeeeeet.

Want ten spyte van die kênserige breinkombers en nog ‘n dag wat sonder lektriek begin en die chaos daar buite is die singende trulife motiveringskoor in die grootboom reg…… dis ‘n blessing om weer wakker te word en nog ‘n kans te hê. En elkeen se kans lyk anders. Ek vat vandag my kans met blymoedig-tshweeeeeeet-heid aan en gaan nog ‘n keer kliphard probeer. Jy ook, nê?

Dankbaar-goedjies, want ons self-motiveer en kap aan soos dapper soldate, selfs deur ons stukkendgeit, of hoe?
Dankbaar, en ek bedoel erg woes-erg dankbaar vir tettiekettie strêppies wat verstel – nou al op my rug …….
Waardering vir my eie rare diep-binneste.
Verheug oor die ligdraers, die opregtes, die genuine onopgesmukte siele.
Doodtevrede met my hier-en-nou.

Dis al, vir nou.
Lolla-groete

Lolla se Nuwejaargoete

Laasjaar was my skryfjaar maar
ook nie want my skryf het halfjaar
begin stotter en
laatjaar opgedroog
soos ‘n erg verwaardlose vetplant
of verdorde rankplant

Het ek vir myself weer heelemal
ge-té-leef en ge-te-béleef en
myself in ‘n kakkenspul van eie-drama ingeweef…. want dis wat ek doen en al sukkel ek dikwels om myself met hierdie wêreld te versoen is daar steeds, altyd onderliggend die opregte wens om beter te doen

Nou is dit nuwejaar en as ek die beste wil maak van my gegewe lewensaar moet ek bedaar, ophou vergaar, in my foon se skerm instaar – ek moet myself bymekaartrek in een sentrale ek-hoofkantoor (lees ‘bubble’) waar ek soms kan bymekaarkom om al die geraas buite te laat, om al my verdwaalde ekke bymekaar te trek in een gemeensame kopvertrek …. my veilige plek 🙃

Ek moet dóén en ophou visioen en met die onveranderlike en onvermydelike versoen ….. oor doen wat ek moet terwyl ek minder oordóén …. vasbyt … beplan, uitvoer en rus. Dis ‘n goeie afskopplan vir tWintigdRie&TwintiG, beslis.

LollaseGoete-groete

Manjifieke Mooiste Maandag

‘Het jy die geel roos gesien’, vra sy my toe ons by die tafel in die eetplek kom. Ek sien die bos geel rose in ‘n blompot op ‘n kassie so entjie weg. ‘Daai?’ vra ek en wink met my oë in die kassie se rigting. Met ‘n ‘Nee, kom kyk’ is ek agter haar aan en hierdie kiekie en ‘n paar ander verewig die oomblik.

Stop and smell the roses 🌹/ flowers.

Hierdie Maandag is gepak vol moontlikhede en kanse. Grip joune.

Haar tyd is beperk, om haar is hordes mede-daisies al uitgedroog en bruin die ewigheid in en steeds pronk sy trots en adelik-mooi. **Maak die heel beste van elke oomblik!**

Lollaliefde xx

Moment in Time Snapshot …. Lolla’s Right Here Right Now

Crazy-ass workspace. Dream journal …. crochet flower turtle …the moon 🌙 🌚 🌔 …. wool ….. reading glasses 👓….. bunny ….. reindeer …. shoes that need a wash ….. diary …. laptop with open spreadsheet …. drinking water …..

Vrydag-Ode

Vrydag sit so lekker op my tong laat my voel soos boerepap met bruingebraaide velletjie en goudgeel stroop

Vrydag is vir my nog alletyd 'n blydag, my-dag, lag-en-skoffeldag.
Tiekiedraai, grootlawaai, skoppelmaai lagdag.

Vrydag sit so lekker op my heup, ek begin hom so met n swaai en 'n skud.
Vrydag is sy dag, haar dag, hulle en julle dag, my dag, jou dag.

V-v-v-rryyyyyddaaaaaag!!!!!

Mag genade, lekker-lag, geluk en blessings jou vandag pootjie en toevou.

Vrolike Vrydag Lolla Groete ♡♡♡

‘n Vinnige Oggend Enetjie

Hiehiehie ek wonder wie gaan hierdie opskrif reg interpreter.

Goeiemore al julle mooi bloggers. 😊

Splinternuwe dag met splinternuwe kanse. Mag ons elkeen vandag ‘n stukkie miracles & magic raakleef.

Daarsy …. dit was toe wel ‘n vinnige enetjie.

Een Hele WP Jaar

WP stuur vroeer vandag vir my ‘n ‘Achievement’ boodskappie. Baie Geluk, dis vandag ‘n jaar terug wat LollaseGoete hier geskep is.

Wat ‘n jaar. Propvol. Op en af, goed en minder goed. Baie WOW-oomblikke.

Ek het ‘n klompie Volgers en ek volg ‘n hele klompie. Dis ‘n lekker spasie hierdie, ons blogland.

Skryf en dink en deel neem tyd. Al is dit hóé lekker is daar soms netnie genoeg tyd om voor te bly nie. Maar as dinge in ‘die regte lewe’ woesdol gaan, kan ek altyd vir ‘n rukkie hier by julle kom wegkruip.

Ek is ‘n Goue Vrou met ‘n sagte, dankbare hart wat soos almal anders elke dag skaaf en bou en pleister aan my plekkie onder die son.

Dankie vir ‘n gemaklike, veilige spasie waar ek my Lolla-kruiwatjie kan kom omtiep nou-en-dan.

*Dit hoef nie perfek te wees nie, maar dit moet samblief tog eerlik en opreg wees.*

Lolla-Groete 🌸🌸🌸

Wolke Betjoinks

Ek het letterlik derduisende fotos van wolke. Skuimeriges, wolleriges, aggresiewe wolke. Kleines, grotes, enkeles …. wolkkomberse en marshmallow wolke. Spatsels wolke en fabelagtige wolke.

*Maandagmiddag-wolke Asem-wegslaan-wolke*

Soms wonder ek hoeveel mense nie die wolke raaksien nie. Is almal soos ek, altyd gereed om met die volgende vertoning weggeblaas te word na ‘n wonderwolkewêreld. Is daar mense vir wie wolke net “ag dis net nog ‘n wolk” of “wolke, huh, watse wolke” is?

Al die fotos hierbo is vroeer die week met my Samsung foon geneem.

So wat reken julle? Is die daaglikse hemelse teater vir almal ewe asemrowend of minstens ‘n gewaardeerde verskynsel? Óf, is Lolla met die maan én met wolke begogeld?

Lolla liefdegroete ☁️☁️☁️💙🤍💙

Terugblik op Gisters

Die Boek-van-Gesigte wys vir my grepe uit my verlede. Altyd goeie én slegte tye. Dis mos die Lewe se wipplankgeite.

02 Nov 2009, skryf ek:

Bedrywige Maandag wat voorle, net 6 weke van werk oor … Dis ‘n vol lewe waarvoor ek elke dag dankbaar is. Sien met oordrewe opwinding uit na die Desember-vakansie wat voorle. Lekker week maters!! xx

*Lank lank gelede, nog voor ek 40 behaal/gehaal* het.

02 November 2013:

Vandag is die dag!! Soveel dinge om te doen, die lysie is lank. So let the games begin ……

Buite saam met die honde vroegoggend asem geskep – Tick 🙂
BBMs geantwoord en emails gelees – Tick
Avon reps status-check – Tick
Faceboek status ge-update – Tick
Ketel aangesit vir vroegoggend koffie – Tick
Jog uit die bed geskop om op te staan ….. hehehe, hier gaat ek …..

Praat later maters xx xx

*Hierdie het op ‘n stadium aanlyn die rondtes gedoen. Ek giggel, maar dis eintlik so* waar.

*02 November 2019 – ons vier die Springbokke se oorwinning oor Engeland. 32 – 12*

02 November 2018:

Lalla sê mos gister dis ‘n woestelike dag. Lalla was reg – dit was eintlik ‘n woestelike dag, week, maand EN jaar.

Roadtrip pending ….
Muskiete vreet vir my op.
Nie almal kan my handle nie, en dis fine. (DIS FINE!!!)
Ek het heeltemal teveel suiker geeet hierdie week. (Who cares ne.)
Die duiwel loop rerig rond soos ‘n brullende leeu.
Daar is krag in gebed. Daar is krag in geloof.
Musiek kleur my wereld in. (Al sing ek vals, ne Mella.)
Ek slip op met kontak hou, veral juis waar dit saakmaak. Tyd sluk my pokkellyf heel in.
Ek is nie ‘n effentjies mens nie, maar ek het ervaring in “biki-biki maak baja”.
Die van julle vir wie ek lief is, weet dit!!!! Ne!?!
Ek weet baie van julle is rerig lief vir my. Dankie. xx
Ek is dankbaar.
Oooooohhhh hoor en luister mooi: NEVER SAY NEVER!!! (Eendag gaan ek kaalvoet op ‘n strand bly.)

Vandag is ek ooh soo dankbaar vir elke oomblik. En ek is geseend met tyd om nog oomblikke te geniet en benut. Oor die laaste dekade het ek vele male die direkte aanslag van verlies ervaar en is bewus hoe broos en kosbaar die lewe is.

My lewe is propvol en ‘it is well with my soul’. To many, many more happy memories.